23/08/2012

Furtivos causan danos en varios xácigos arqueolóxicos da Mariña

Roda de muíño desaparecida castro do Carreiro. (Foz)



Achegamos eiquí o texto da denuncia que nos envían amabelmente desde a asociación MariñaPatrimonio sobre a recente agresión, froito do expolio furtivo, de varios castros e un xácigo de época romana na Mariña luguesa
    
     
     Mariñapatrimonio denuncia perante o SEPRONA o espolio de varios xacementos arqueolóxicos na Mariña.

O castro do Carreiro, o castro de Fazouro, o xacemento da Pampillosa e o de Estabañón afectados por delincuentes cazatesouros.

A Mariña, 23 de agosto de 2012.- O pasado marzo Mariñapatrimonio daba a coñecer a existencia dun importante castro costeiro no lugar do Carreiro en Foz. Entre os numerosos restos arqueolóxicos visibles nos cantís, destacaban muros das cabanas e unha roda de muíño, desaparecida recentemente, tal e como detectou un veciño de Foz que contactou con Mariñapatrimonio.

Lugar onde se atopaba a roda de muíño Castro do Carreiro

O 25 de maio o Parlamento aproba nunha sesión da Comisión de Educación e Cultura unha iniciativa da deputada Emma Álvarez, encamiñada á protección, estudo e sinalización do xacemento arqueolóxico do Carreiro, polo que a retirada do muíño deberían realizala os técnicos da Dirección Xeral de Patrimonio, pero lamentablemente actuaron antes os espoliadores que a Xunta, responsable da conservación e protección do patrimonio tal e como recolle a lei.

Muro das cabanas destruído Castro do Carreiro (Foz)
A destrucción do Patrimonio non se debe unicamente aos delincuentes cazatesouros, senón que ás veces unha práctica tan inocente como é a pesca con cana dende os cantís pode afectar a un xacemento cando os pescadores, por descoñecemento, desmontan e destrúen os muros das cabanas do castro para coller boas pedras que termen das canas. Dende que soubemos da existencia do castro do Carreiro, hai uns cinco meses, comprobamos que estas prácticas están a mermar notablemente as estruturas do xacemento.

Escavación Ilegal no Castro de Fazouro (Foz)
Mariñapatrimonio visitou outros xacementos da zona e comprobou que no castro de Fazouro (Foz), un dos máis emblemáticos da Mariña e sobre o que se están levando a cabo os trámites para ser declarado BIC, o que supón a máxima protección para un Ben Patrimonial, as pedras dos muros tamén están sendo aproveitadas polos pescadores e aprécianse claramente as escavacións dos espoliadores.

Acción dos furtivos na Pampillosa (Foz), fragmentos de tégula apilados
Por outro lado, no xacemento romano da Pampillosa (Foz) é máis visible a acción dos furtivos que deixaron fragmentos de tégula apilados no lugar que escavaron , posiblemente por consideralos de menor interese. Por último, o extraordinario xacemento de Estabañón (Viveiro), atópase nun estado de abandono lamentable despois de que o proxecto multimillonario de Costas non fose adiante e a súa intervención só servise para deteriorar o xacemento e facilitarlles o labor aos espoliadores, que continúan pola súa conta facendo escavacións.

Escavación ilegal xacemento Estabañón (Viveiro)
Estes feitos, que consideramos especialmente graves e que poden ser constitutivos dun delito de danos ao Patrimonio cultural de Galiza, foron denunciados por Mariñapatrimonio perante o SEPRONA co fin de que se practiquen as dilixencias necesarias para o esclarecemento destes feitos


Manuel Miranda (MariñaPatrimonio)


Nenhum comentário:

Postar um comentário

Lembre que ao colocar un comentario nesta páxina asume a responsabilidade polo contido das súas opinións.